Eitt til tvö himbrimapör verpa á vatnsbakkanum, bæði að austanverðu og vestanverðu við vatnið, á hverju vori. Síðan halda þau til á vatninu fram í oktober. Himbriminn er einn þeirra þriggja fuglategunda sem erlendir fuglaskoðarar sækjast eftir að sjá hér á landi en hann ásamt straumönd og húsönd verpa hvergi annars staðar i Evrópu. Því er Úlfljótsvatn og Sogið nærtækasti staðurinn sé haldið frá höfuðborgarsvæðinu. Himbriminn er viðkvæmur og jafnvel "tilfinningasamur" og þarf hann að hafa frið meðan á varpi stendur ella er hætta á að það fari forgörðum. Hann er hvort tveggja í senn forvitinn og var um sig. Er leikur margra manna, er þeir eru að veiðum á eða við vatnið, að kallast á við hann, sem styngur sér þá og kafar í átt til þess sem kallar, væntanlega til að kanna hvers kyns er og hvort öllu sé óhætt. Engin fuglahljóð eru jafn átakanleg og grátur himbrimans missi hann maka sinn. Þá má heyra grátinn það sem eftir lifir sumars eða þar til að honum hefur tekist að eignast nýjan lífsförunaut. Himbriminn er á válista Náttúrufræðistofnunar./GG.

Ljósmyndari: Jakob Sigurðsson | Staður: Á Þingvallavatni | Tekin: 18.7.2004 | Bætt í albúm: 12.5.2006